24.04.2024
Hrein eign Lífeyrissjóðs bankamanna nam 110,5 milljörðum króna í lok árs 2023 og hækkaði um 7,8 milljarða króna milli ára. Hrein nafnávöxtun Aldursdeildar var 9,8% á árinu 2023 sem samsvarar 1,7% raunávöxtun. Hjá Hlutfallsdeild var hrein nafnávöxtun 10,3% á árinu 2023 sem samsvarar 2,1% raunávöxtun.

25.04.2024
Ársfundur Lífeyrissjóðs bankamanna verður haldinn miðvikudaginn 29. maí næstkomandi kl. 17:00 á Hótel Reykjavík Grand, Sigtúni 28. Vakin er athygli á að viku fyrir ársfund fer fram rafræn kosning þriggja stjórnarmanna og skulu tilkynningar um framboð, ásamt upplýsingum um starfsferil, berast skriflega til skrifstofu sjóðsins eigi síðar en tveimur vikum fyrir ársfund skv. 2. grein samþykkta sjóðsins. Verða frambjóðendur kynntir á heimasíðu sjóðsins eftir að framboðsfresti lýkur þann 15. maí.

21.11.2023
Frumvarp fjármála- og efnahagsráðherra um slit ÍL-sjóðs felur í sér viðurkenningu á rétti skuldabréfaeigenda til vaxta af íbúðabréfum allt til lokagjalddaga og ábyrgð ríkisins á þeim. Felst í þessu grundvallarbreyting á afstöðu ráðherrans frá því sem verið hefur. Frumvarpið myndi hins vegar vera fjarri því að ná yfirlýstum markmiðum sínum yrði það að lögum. Það myndi að öllum líkindum auka við fjárútgjöld ríkisins, raska jafnvægi á fjármálamarkaði, skapa áratuga óvissu um uppgjör á skuldbindingum ÍL-sjóðs og skaða orðspor ríkisins. Lögin myndu því beinlínis stríða gegn þeim markmiðum sem að er stefnt.

17.11.2023
Nýjar samþykktir Lífeyrissjóðs bankamanna hafa verið staðfestar af Fjármála- og efnahagsráðherra. Helstu breytingar eru eftirfarandi:

1. Lækkun á árlegum réttindastuðli Hlutfallsdeildar úr 1,82% í 1,62% og hámarks eftirlaunahlutfalli úr 72,8% í 64,8% samsvarar um 11% lækkun á lífeyrisréttindum í Hlutfallsdeild. Breytingin tekur gildi 1. desember 2023.
2. Breyting á viðmiðunaraldri í Aldursdeild til útreiknings á lágmarkstryggingarvernd sem hækkar úr 67 árum í 70. Eftir sem áður er hægt að hefja lífeyristöku hvenær sem er frá 65 ára aldri og er ávinnslutöflum og flýtingar- og frestunartöflum breytt þannig að réttindi haldast nær óbreytt. Breytingarnar taka gildi 1. janúar 2024.
3. Heimild sett inn í samþykktir til að framkvæma stjórnarkjör með rafrænum hætti. (2. gr. samþykkta)

11.09.2023
Fyrir liggur afstaða meirihluta stjórna aðildarfyrirtækja Lífeyrissjóðs bankamanna til þeirra 6 tillagna til samþykktarbreytinga sem samþykktar voru á ársfundi sjóðsins þann 24. maí síðastliðinn.

Tillögur 1 og 2 varðandi lækkun hlutfalls eftirlauna og réttindastuðuls í  Hlutfallsdeild voru staðfestar.

Tillaga 6 um rafrænt stjórnarkjör var staðfest.

Tillögum 3-5 um hækkun iðgjalds til Aldursdeildar var hinsvegar hafnað.

25.05.2023
Ársfundur Lífeyrissjóðs bankamanna var haldinn á Hótel Reykjavík Grand þann 24. maí síðastliðinn  og hófst hann kl. 17:00. Fundarstjóri var kjörinn Hinrik Greipsson og ritari fundarins var Pálmi Rögnvaldsson.

12.05.2023
Áform fjármála- og efnahagsráðherra um lagasetningu er varðar slit og uppgjör á ÍL-sjóði byggja á ófullnægjandi greiningu á lagalegum og fjárhagslegum þáttum og fela í sér tilraun til að sniðganga fjárhagslegar skuldbindingar ríkisins. Fyrirhuguð löggjöf fæli í sér eignarnám, væri andstæð stjórnarskrá og til þess fallin að baka íslenska ríkinu skaðabótaskyldu sem kynni að hafa í för með sér veruleg viðbótarfjárútlát af hálfu ríkissjóðs í formi dráttarvaxta og kostnaðar. Þetta er meðal þess sem kemur fram í athugasemdum tuttugu lífeyrissjóða við áformaskjal ráðherra sem birt hefur verið í samráðsgátt stjórnvalda.

14.05.2023
Fyrirliggjandi eru tillögur stjórnar til breytinga á samþykktum Lífeyrissjóðs bankamanna fyrir ársfund sem haldinn verður þann 24. maí 2023.

23.04.2023
Ársfundur Lífeyrissjóðs bankamanna verður haldinn miðvikudaginn 24. maí næstkomandi kl. 17:00 á Hótel Reykjavík Grand, Sigtúni 28. Tillögur til breytinga á samþykktum Lífeyrissjóðs bankamanna munu liggja frammi á skrifstofu sjóðsins að Skipholti 50b eigi síðar en viku fyrir ársfund. Einnig verður hægt að nálgast tillögurnar og allar nánari upplýsingar hér á vef sjóðsins.

21.04.2023
Hrein nafnávöxtun Aldursdeildar var 0,1% á árinu 2022 sem samsvarar 8,5% neikvæðri  raunávöxtun samanborið við 10,6% jákvæða raunávöxtun á árinu 2021. Hrein nafnávöxtun Hlutfallsdeildar var 7,2% á árinu 2022 sem samsvarar 2,0% neikvæðri raunávöxtun samanborið við jákvæða 4,3% raunávöxtun á árinu 2021.

24.03.2023
Landsréttur kvað í dag upp dóm í máli Hlutfallsdeildar Lífeyrissjóðs bankamanna gegn aðildarfélögum og íslenska ríkinu. Var dómur Héraðsdóms Reykjavíkur staðfestur og aðildarfyrirtækin og íslenska ríkið sýknað af  kröfum sjóðsins.

18.12.2022
Stjórn Lífeyrissjóðs bankamanna tók þá ákvörðun á fundi sínum í vikunni að ekki sé grundvöllur fyrir viðræðum við Fjármála- og efnahagsráðuneytið um uppgjör íbúðabréfa á þeim forsendum sem lagt hefur verið upp með af hálfu ráðherra og byggt á þeim samningsmarkmiðum sem hann hefur kynnt. Í ljósi þeirra afdráttarlausu lögfræðiálita sem fram hafa komið telur stjórn það ekki samræmast umboðsskyldu sinni að taka þátt í samningaviðræðum á þeim grundvelli.